Okeanın ağzında

Çarli, Kaz və onların köməkçisi Benni kiçik təyyarə ilə ər-arvad Mişel və Cocini adaya aparmağa razılaşırlar. Cütlük babalarının vəsiyyətini yerinə yetirmək və onun külünü həmin sahilə səpmək istəyir. Təyinat yerinə çatanda onlar köpəkbalığı hücumundan həlak olmuş bir kişinin cəsədi ilə qarşılaşırlar. Onun telefonundakı fotolardan sağ qalan qızın ola biləcəyini anlayan qrup axtarışa yola düşür.

Yaxşılıq etmək istəyi fəlakətlə nəticələnir: təyyarə zədələnərək açıq dənizin ortasında batır. Qəzadan sonra salamat qalan beş nəfər rezin salda köməksiz qalır. Ətrafda dolaşan nəhəng yırtıcı isə dreyf edən sərnişinləri təqib etməyə başlayır.

«Okeanın ağzında» (Great White) qorxu filmi rejissor Martin Vilson tərəfindən ekranlaşdırılıb. ABŞ, Böyük Britaniya və Avstraliya istehsalı olan bu ekran əsəri 2020-ci ildə işıq üzü görüb. Baş rollarda Katrina Bouden, Aaron Yakubenko, Tim Kano və Te Kohe Tuhaka çəkiliblər.