Fəryad

Madriddə yaşayan tələbə Andrea doğulduqdan dərhal sonra Argentinada övladlığa götürüldüyünü öyrənir. Üstəlik, onun bioloji anası cəmi bir ay əvvəl vəfat etmişdir.

Bu həqiqətin ardınca gənc qız qorxunc hadisələrlə üzləşir. Qulaqlıqlarından naməlum qadın hönkürtüsü eşidilməyə başlayır, çəkdiyi bütün şəkil və videolarda isə qara geyimli qoca bir kişi peyda olur. Ən qəribəsi isə odur ki, gerçək həyatda nə Andrea, nə də ətrafındakılar həmin adamı görmür.

«El llanto» adlı dəhşət filmi 2023-cü ildə İspaniya, Argentina və Fransa tərəfdaşlığı ilə istehsal olunub. Ekran əsərinin quruluşçu rejissoru Pedro Martin-Kalerodur, əsas rolları isə Xuan Kavoti Katerbona, Kristian del Valle, Ale Russek və Entso Kardinali canlandırıb.