Countdown

Əyləncə məclisində toplaşan bir qrup gənc telefona ölüm vaxtını göstərən yeni bir tətbiq yükləyir. Qızlardan birinə ömrünün bitməsinə cəmi üç saat qaldığı bildirilir. Qorxuya düşən qız sərxoş sevgilisinin maşınına minməkdən imtina etsə də, elə həmin gecə naməlum bir qüvvə tərəfindən öldürülür. Avtomobili ağaca çırpan gənc isə xəstəxanaya düşür və əməliyyat ərəfəsində sayğacın son saatları göstərməsindən bərk təşvişə düşür.

Həmin xəstə də həyatını itirdikdən sonra xəstəxananın tibb bacısı Kuinn ciddi qorxu hissi keçirir. Çünki o da həmin proqramı yükləyib və ona cəmi iki gündən bir az çox vaxt qaldığı göstərilib. İndi gənc qadın vaxtı tamam olmadan bu tətbiqin insanları necə məhv etdiyini öyrənməlidir.

ABŞ istehsalı olan «Countdown» qorxu filmi 2019-cu ildə rejissor Castin Dek tərəfindən lentə alınıb. Filmin əsas rollarında Britt Rentşler, Kristina Pasitski, Cordan Kellouey və Dirk Rocers çəkiliblər.