15 dəqiqəlik rüsvayçılıq

Rəqəmsal dövrdə ictimai qınaq bir anda insanın həyatını və reputasiyasını darmadağın edə bilir. «15 Minutes of Shame» sənədli filmi internetdə təqib mədəniyyətinin köklərini və kütləvi linç hallarının səbəblərini araşdırır. Ekran əsəri qəfildən geniş auditoriyanın nifrət hədəfinə çevrilmiş insanların real hekayələrinə nəzər salır.

Layihə təkcə qurbanların yaşadıqlarını deyil, nifrət dalğasını başladanların psixoloji səbəblərini də təhlil edir. Süjetdə psixoloqlar, media nümayəndələri və şahidlərin şərhlərinə yer verilir, həmçinin zərərçəkənlərin ailələrinin bu təzyiqlərə necə reaksiya verdiyi göstərilir. Araşdırma cəmiyyətin və sosial şəbəkələrin kollektiv davranışını faktlarla ortaya qoyur.

ABŞ istehsalı olan bu filmin rejissoru Maks Cozefdir və ekran işi 2021-ci ildə işıq üzü görüb. Baş rollarda və ekspert qismində Maks Cozef özü ilə yanaşı Monika Levinski, Con Ronson və Kara Svişer çıxış edir.