Çelsi hotelinin yuxuları

Nyu-Yorkun məşhur «Çelsi» hoteli uzun illər boyu altmışıncı və yetmişinci illərin andeqraund mədəniyyətinin əsas mərkəzlərindən biri olub. Lakin həmin dövr artıq arxada qalıb və köhnə bina böyük dəyişiklik ərəfəsindədir. Tikinti şirkətləri əfsanəvi məkanı Manhettendə adi butik-hotelə çevirməyə hazırlaşırlar.

Təmir işlərinin getdiyi, toz və inşaat iskalalarının bürüdüyü dəhlizlərdə hələ də keçmiş bohemanın yaşlı nümayəndələri qalmaqdadır. Yaradıcı peşə sahibləri olan bu sakinlər doğma divarların başqa bir məkana çevriləcəyinə inanmaq istəmirlər. Onların arasında rəqqasə və xoreoqraf Merle Lister də var.

«Dreaming Walls» sənədli filmi rejissorlar Maya Düverdye və Ameli van Elbt tərəfindən lentə alınıb. 2022-ci il istehsalı olan bu layihə ABŞ, Fransa, Niderland, İsveç və Belçikanın birgə əməkdaşlığı ilə ərsəyə gəlib.