Baskiya: Reallığın partlayışı

«Boom for Real: The Late Teenage Years of Jean-Michel Basquiat» sənədli filmi Jan-Mişel Baskiyanın yaradıcılıq yolunun ilk çağlarına nəzər salır. Hadisələr 1970-ci illərin sonu və 1980-ci illərin əvvəllərində, Nyu-York şəhərində cərəyan edir. Şəhər böhran içində boğulur, sığorta pulları naminə boş binalar qəsdən yandırılırdı və küçələrdə yaşayan gənc rəssam da bu mühitin bir parçası idi.

Ekran əsəri Haiti əsilli gəncin dağılmaqda olan meqapolis küçələrində atdığı ilk addımları təqdim edir. Hekayə onun yeniyetməlik illərindən başlayaraq ilk tablosunun satışına qədər olan dövrü əhatə edir. O dövrdə onunla bir yerdə olan dostları Baskiyanın andeqraund mühitdəki ilk uğurlarından bəhs edirlər.

Filmin rejissoru Sara Drayverdir. 2017-ci ildə ABŞ, Fransa, Portuqaliya və Yunanıstanın birgə istehsalı ilə çəkilən layihədə Aleksis Adler, Qlenn O’Brayen, Patrışa Fild və digər mədəniyyət xadimləri yer alıb.