Martin Skorsezedən Amerika kinosunun tarixi

Birləşmiş Ştatların kinematoqrafiyası ilk addımlarından nəhəng bir sənaye səviyyəsinə qədər zəngin bir yol qət edib. «A Personal Journey with Martin Scorsese Through American Movies» adlı sənədli film bu irsin köklərini araşdırır və Paramount, Fox kimi nəhənglərin fərqli cəhətlərini göstərərək Hollivud studiya sisteminin quruluşunu izah edir.

Ekran əsərində qanqster filmləri, vesternlər və müzikllər kimi əsas janrlar təhlil olunur. Keçmişin rejissorlarının geniş ekrandan necə yararlandıqları, hansı vizual fəndlərə əl atdıqları, montaj, səs və rəng vasitəsilə qorxu, təhlükə və ya ehtiras hisslərini lentə necə köçürdükləri arxiv kadrları ilə nümayiş etdirilir.

1995-ci ildə işıq üzü görən bu filmi Martin Skorseze və Maykl Henri Uilson lentə alıb. ABŞ, Böyük Britaniya və Fransanın birgə istehsalı olan layihədə Corc Lukas, Ellison Anders və Ketrin Biqelou yer alıb.