Bryus Li – əfsanəvi insan

«Bryus Li – əfsanəvi insan» sənədli filmi döyüş sənəti ustasının həyat yolunu araşdırır. Ekran əsəri onun doğulduğu yer, ailəsi, valideynləri, xanımı və övladları haqqında məlumat verir. Burada Linin ilk addımlarını və kino karyerasındakı əsas döyüş səhnələrini əks etdirən nadir arxiv kadrları yer alır.

Ekran işində Bryus Linin yaratdığı «Cit Kun Do» kunq-fu üslubunun formalaşması təsvir olunur. Eyni zamanda layihə onun qəfil və müəmmalı vəfatı ətrafında yaranan müxtəlif fərziyyələrə toxunur.

Honkonq istehsalı olan bu sənədli filmin rejissoru Leonard Hodur. 1984-cü ildə buraxılmış layihədə Ceyms B. Nikolson, Li Hoy-Çuen, Hon Sanq Siu və Bryus Li kimi simalar yer alıb.