Nasist ölüm düşərgəsindən qaçış

İşğal altındakı Şərqi Polşada fəaliyyət göstərən Sobibor düşərgəsi nasistlər tərəfindən yalnız kütləvi qətllər törətmək məqsədilə qurulmuşdu. Oraya gətirilənlərin mütləq əksəriyyəti dərhal məhv edilir, yalnız gündəlik işlərə yarayan az sayda sənətkar və fəhlə müvəqqəti sağ saxlanılırdı.

1943-cü ilin yazında məhbuslar arasında düşərgənin ləğv ediləcəyi barədə xəbərlər dolaşmağa başlayır. Ələ keçən bir qeyd isə oxşar Beljets düşərgəsinin bağlanması zamanı bütün sağ qalan fəhlələrin qətlə yetirildiyini aşkara çıxarır. Əcəlin qaçılmaz olduğunu dərk edən məhbuslar sovet hərbi əsiri Aleksandr Peçerski və Leon Feldhendlerin rəhbərliyi ilə gizli qrup yaradaraq üsyana hazırlaşırlar.

«Nasist ölüm düşərgəsindən qaçış» adlı qısametrajlı sənədli filmin rejissoru Hervard Pellinqdir. 2014-cü ildə ABŞ-da çəkilən filmdə Piter Klements, Erik Meyers, Uilyam Lüdviq və Süzanna Herbert rol alıb.