Qırmızı hərarət

Amerikalı tələbə Kristina Karlson Qərbi Almaniyada çalışan nişanlısının yanına səfər edir. Gizli tapşırıq yerinə yetirən kəşfiyyatçının yaxınlığında təsadüfən peyda olması onun taleyini dəyişir: hər iki şəxs qaçırılaraq Şərqi Almaniyaya aparılır. Yerli hakimiyyət qızı Mərkəzi Kəşfiyyat İdarəsinin casusu zənn edir, onu dindirir və qadın həbsxanasına salır.

Cəzaçəkmə müəssisəsində qanunları sərt dustaq Sofiya müəyyənləşdirir və Kristina burada sağ qalmaq üçün mübarizə aparır. Bu vaxt onun nişanlısı bürokratik maneələri aşaraq sevgilisinin yerini tapmağa çalışır. Həqiqəti öyrəndikdən sonra o, qızı xilas etmək məqsədilə xüsusi desant əməliyyatı hazırlayır.

1985-ci ildə ekranlara çıxan «Qırmızı hərarət» (Red Heat) filmi Avstriya və AFR kinematoqrafçılarının birgə işidir. Ekran əsərinin rejissorları Robert Kollektor və Ernst R. fon Toymerdir. Əsas rolları Silviya Kristel, Maykl Troy, Albert Fortell və Syu Kil canlandırıb.