Qaranlıqda danışılan qorxulu hekayələr

1968-ci ilin Hellouin gecəsində qorxulu rəvayətləri sevən məktəbli Stella və onun iki yoldaşı qəribə geyimlərdə gəzintiyə çıxırlar. Yerli xuliqan Tommi ilə aralarında yaranan mübahisədən sonra qaçmağa məcbur olan gənclər Ramon adlı bir qəriblə rastlaşırlar. Birlikdə vaxtilə Bellouz ailəsinə məxsus olmuş tərk edilmiş malikanəyə üz tuturlar. Təxminən bir əsr əvvəl bütün sakinləri sirli şəkildə yoxa çıxmış bu ev və danışdığı hekayələrlə insanları öldürdüyü iddia edilən Sara haqqında dəhşətli söz-söhbətlər gəzir.

Köhnə binada gizli bir otaq tapan Stella oradan Saranın qələmə aldığı qeyd dəftərini götürür. Çox keçmədən bu kitabın boş səhifələrində öz-özünə yeni bir hadisə yazılır və Tommi qəfil izsiz itir.

«Scary Stories to Tell in the Dark» qorxu və triller filmini rejissor Andre Ovredal ərsəyə gətirib. 2019-cu ildə nümayiş olunan layihə ABŞ, Kanada, Meksika və Honkonq tərəfindən birgə istehsal edilib. Baş rolları Zoi Marqaret Kolletti, Uilyam Korno, Amanda Smit və Xavyer Botet canlandırıblar.