Çakinin lənəti

Anasının gözlənilməz intiharından sonra Nika adlı gənc qadın dərin kədər içində tək qalır. Çox keçmədən onun qətiyyətli böyük bacısı Barbara ailəsi ilə birlikdə dəstək olmaq və miras işlərini yoluna qoymaq üçün evə gəlir. Həmin vaxt Barbaranın azyaşlı qızı evdə naməlum ünvandan göndərilmiş bir bağlama tapır və qutudan kürən saçlı Çaki oyuncağı çıxır.

Oyuncağın peyda olması ev sakinləri üçün qanlı hadisələrin başlanğıcına çevrilir. Baş verən dəhşətləri izləyən Nika bütün bu ölümlərdə qəribə oyuncağın əli olduğundan şübhələnir. Məlum olur ki, Çakinin bu ailə ilə bağlı xüsusi planı var və o, iyirmi il əvvəl yarımçıq qalmış qisasını amansızcasına tamamlamaq niyyətindədir.

«Çakinin lənəti» (Curse of Chucky) filmi rejissor Don Mançini tərəfindən ekranlaşdırılıb. ABŞ və Kanadanın birgə istehsalı olan bu qorxu filmi 2013-cü ildə işıq üzü görüb. Ekran əsərində baş rolları Fiona Durif, Darren Uoll, Aleks Vinsent və Meytlend MakKonnell canlandırıblar.