Bir ekzorsistin gündəliyi

Lukas Vidal uşaq ikən atasının bədəninə girmiş qaranlıq varlıqla mübarizə apara bilməyib intihar etməsinin şahidi olur. Bu ağır itki onun gələcək taleyinə birbaşa təsir göstərir və gənc oğlan həyatını iblislərlə savaşa həsr etməyi seçir. O, qaranlıq qüvvələrlə vuruşan gizli ordenin ən təcrübəli nümayəndələrindən dərslər alaraq qədim sirlərə və xüsusi ayinlərə yiyələnir.

Lakin şər qüvvələr gənc keşişin bu addımını cavabsız qoymur və onun ən zəif nöqtələrinə zərbə endirməyə başlayır. Şeytani varlıqlar Lukasın bacısını hədəf alır, anasını müxtəlif vəsvəsələrlə sınağa çəkir və keşişin öz ruhuna sahiblənməyə çalışır.

Braziliya istehsalı olan «Diário de um Exorcista - Zero» qorxu və triller filmi 2016-cı ildə ekranlara çıxıb. Ekran əsərinin rejissoru eyni zamanda baş rollardan birini canlandıran Renato Siqueiradır. Digər əsas obrazları isə Fabio Tomazini, Diego Andrade və Adriano Arbol ifa edirlər.