İdalqo

Ərəbistan səhrasında keçirilən dözümlülük yarışında əsrlər boyu yalnız bədəvilər və onların cins atları yarışırdı. Lakin 1890-cı ildə varlı bir ərəb şeyxi qədim qaydanı pozaraq bu təhlükəli yürüşə ilk dəfə əcnəbini dəvət edir. Həmin şəxs atası ağdərili, anası isə yerli lakota hindusu olan Frenk T. Hopkins olur.

Amerikalı süvari «Od okeanı» adlanan qədim qaçışda yerli çaparlarla mübarizəyə qoşulur. Çətin iqlim şəraiti və ucsuz-bucaqsız səhra qumları həm atın, həm də onun sahibinin fiziki gücünü son həddə qədər sınayır.

ABŞ və Mərakeş istehsalı olan bu macəra filmi 2004-cü ildə rejissor Co Conston tərəfindən çəkilib. Baş rolu Viqqo Mortensen ifa edib, layihədə həmçinin Zuleyxa Robinson, Ömər Şərif və Luiza Lombard çəkiliblər.