Tələ

Hadisələr XIX əsrdə Kanadanın ucqar şimal meşələrində cərəyan edir. Vəhşi Con ləqəbli tənha ovçu il boyu kimsəsiz daxmasında yaşayır, yalnız ildə bir dəfə qəsəbəyə enərək xəzlərini satır və ərzaq tədarükü görür. Növbəti səfərində o, yerli tacirin xidmətçisi olan İvini min dollara alaraq özünə arvad etmək qərarına gəlir.

Uşaq ikən ailəsinin quldurlar tərəfindən qətlə yetirilməsinə şahid olan İvi bu dəhşətdən sonra nitqini itirib və insanlardan qorxmağa başlayıb. Bir-birinə tamamilə yad olan bu iki insan sərt təbiətin qoynunda tədricən bir-birinə alışır və aralarındakı münasibət sevgiyə çevrilir.

Macəra və dram janrında çəkilmiş «The Trap» filminin rejissoru Sidni Hayersdir. Böyük Britaniya və Kanadanın birgə istehsalı olan bu lentdə baş rolları Rita Tuşinqem, Oliver Rid, Reks Sevenoks və Barbara Çilkott canlandırıblar.