Mənim adım Trinitadır

«İblisin sağ əli» ləqəbi ilə tanınan cəld və sərrast atıcı Trinita yolu üstündəki kiçik bir qəsəbəyə gəlib çıxır. Burada o, gözlənilmədən «İblisin sol əli» kimi tanınan ögey qardaşı Bambino ilə rastlaşır. Qardaşların anası vaxtilə fahişəxana işlətdiyi üçün onlar atalarının kim olduğunu bilmirlər. Əslində qarətçi olan Bambino qəsəbənin həqiqi şerifinin ayağını sındıraraq gizlənmək məqsədilə onun yerini tutub və qanun keşikçisi cildinə girib. Trinita isə qardaşına qoşulmaq qərarına gəlir.

Bir müddət sonra yerli mormon icması onları həqiqi şerif zənn edərək kömək istəyir. İcma üzvləri yerli torpaq sahibinin və onun quldur dəstəsinin zülmündən əziyyət çəkirlər. Öz cinayət planlarını quran qardaşlar əvvəlcə qanun qorumaq həvəsində olmasalar da, Trinitanın mormon qızlarına vurulması vəziyyəti dəyişir və quldurları sərt cavab gözləyir.

«Mənim adım Trinitadır» komediya vesterni 1970-ci ildə İtaliyada rejissor Entso Barboni tərəfindən çəkilib. Əsas rolları Terens Hill, Bad Spenser, Cess Hill və Oskar Custini canlandırıblar.