Xain qəhrəman

XIX əsrin ortalarında ABŞ ordusunda xidmət edən irlandiyalı katolik mühacirlər protestant zabitlər tərəfindən ciddi dini və milli ayrı-seçkiliyə məruz qalırlar. Davamlı təzyiqlərə dözməyən çavuş Con Rayli və onun əsgər yoldaşları Amerika sıralarını tərk edərək Meksika sərhədinə keçmək qərarına gəlirlər.

1846-cı ildə ABŞ ilə Meksika arasında müharibə başlayanda bu döyüşçülər öz yaşıl bayraqları altında toplaşaraq «Müqəddəs Patrik briqadası»nı yaradırlar. «San-Patrisios» adlanan dəstə yeni vətənləri və din qardaşları uğrunda cəbhədə fəal mübarizə apararaq Meksika ordusunun ən güclü hərbi birləşmələrindən birinə çevrilir.

«Xain qəhrəman» tarixi dram filmi 1999-cu ildə rejissor Lens Hul tərəfindən ABŞ, İspaniya və Meksikanın birgə istehsalı kimi çəkilib. Ekran əsərində əsas rolları Karlos Karrasko, Vanessa Bauçe, Harrison Herşberqer və Lyuk Heyden canlandırıblar.