Bağışlanmamış

«The Unforgiven» filminin hadisələri 1850-ci illərdə Texas torpaqlarında cərəyan edir. Zaxariya ailəsinin başçısı vaxtilə hinduların hücumu zamanı həlak olduqdan sonra ana üç oğlunu və Reyçel adlı qızı təkbaşına böyütməli olur. Doğma valideynləri qətlə yetirilmiş balaca qız illər boyu bu ailənin doğma üzvü kimi yaşayır.

Lakin kayova qəbiləsindən olan hindular Reyçelin əslində onların soyundan gəldiyini öyrəndikdə hər şey dəyişir. Qızı geri almaq üçün gələn dəstədən qorxan qonşulardan heç kim mühasirədə qalan ailəyə kömək etmir. Qardaşlar, ana və Reyçel amansız basqınçıların qarşısını təkbaşına almaq məcburiyyətində qalırlar.

Bu dramatik vestern rejissor Con Hyuston tərəfindən 1960-cı ildə ABŞ-da çəkilib. Ekran əsərində baş rolları Bert Lankaster, Odri Hepbern, Odi Merfi və Con Sakson ifa ediblər.