Chica Vampiro

Musiqili komediya teatrında müğənni olmaq istəyən Deyzi O’Brayan ilk baxışdan adi bir qız təsiri bağışlayır. Lakin onun valideynləri əslində vampirdir. Ailə qaydalarına görə, on altı yaşı tamam olanda o, insan kimi qalmaq və ya valideynləri kimi varlığa çevrilmək barədə qərar verməlidir. Qonşuluqda yaşayan Maksa aşiq olduqdan sonra Deyzi insan həyatını seçsə də, baş verən bədbəxt hadisə hər şeyi alt-üst edir.

Qızlarının həyatını qurtarmaq istəyən valideynlər onu dişləyərək vampirə çevirmək məcburiyyətində qalırlar. Bundan sonra Deyzi həm adi məktəbə getməli, həm də yeni çevrilmiş vampirlər üçün nəzərdə tutulan dərslərdə iştirak etməlidir. O, ətrafındakılardan bu böyük sirri gizlədərək iki fərqli həyat sürməyə məcbur olur.

Kolumbiya istehsalı olan «Chica Vampiro» serialı 2013-cü ildə işıq üzü görüb. Ekran işinin rejissorluğunu Uilyam Barraqan və Andres Birmann həyata keçirib. Baş rolları Qrisi Rendon, Linda Lusiya Kallexas, Vannesa Blandon və Bibiana Navas canlandırıb.