Eddi Makdaudun 100 yaxşı əməli

On yeddi yaşlı davakar Eddi Makdaud ətrafdakı hər kəsə rahatlıq vermir, həm uşaqları, həm də böyükləri qorxu içində saxlayırdı. Cəzasızlıq onun qarşısına sehirbaz olan qəribə bir səfil çıxana qədər davam edir. Etdiyi zülmlərin cəzası olaraq yeniyetmə köpəyə çevrilir.

Əvvəlki görkəminə qayıtmaq üçün yeganə yol düz yüz yaxşı əməl həyata keçirməkdir. Vəziyyəti çətinləşdirən amil odur ki, dördayaqlı Eddinin danışığını yalnız digər heyvanlar və əvvəllər incitdiyi insanlar başa düşür. Qəhrəmanın son qurbanlarından olan utancaq Castin ona kömək etməyə razılaşır və ikili bu tapşırığı yerinə yetirməyə çalışır.

1999-cu ildə yayımlanmağa başlayan «100 Deeds for Eddie McDowd» komediya serialı ABŞ və Kanada istehsalıdır və üç mövsümdən ibarətdir. Ekran işinin rejissorluğunu Pol Hoen və Kristofer Koppola edib, əsas rolları isə Brendon Qilberstadt, Katrin MakNil, Uilyam Frensis MakQuayr və Roudi canlandırıb.