El amor no es como lo pintan

Ağıllı və hazırcavab Alisiya bir qədər dolu bədən quruluşuna malik gənc qadındır. O da digər insanlar kimi onu olduğu kimi qəbul edəcək və səmimi sevəcək bir həyat yoldaşı axtarır. Tezliklə onun qarşısına xəyalındakı ideal obrazı sanki iki yerə bölən iki fərqli kişi çıxır.

Onlardan biri kinorejissor olmaq istəyən yaraşıqlı jurnalist Sezar Seqoviyadır, lakin o, pula və cazibədar qadınlara həddindən artıq aludədir. Digəri isə Alisiyanın internetdə tanış olduğu və özünə «Kinoman» ləqəbi qoyan sirli biridir. «El amor no es como lo pintan» serialının qəhrəmanı həqiqi sevgisini tapmağa çalışarkən həyatındakı bu iki fərqli simanın əslində eyni insan ola biləcəyindən şübhələnməyə başlayır.

Meksika istehsalı olan bu teleserial 2000-ci ildə işıq üzü görüb. Ekran əsərinin rejissoru Antulio Ximenes Ponsdur, baş rolları isə Vanessa Akosta, Viktor Qonsales, Susana Aleksander və Rodriqo Kaçero canlandırıb.