Kanarlara xoş gəlmisiniz

Atasının vəfatından sonra Lera tək qalır. Əyləncəli və qayğısız həyata öyrəşən gənc qız atasından qalan şirkətin idarəçiliyini nişanlısı Alekseyə həvalə edir. Çox keçmədən məlum olur ki, o, müəssisəyə olan bütün mülkiyyət hüququnu da sevgilisinə ötürüb. İstədiyini alan Aleksey isə Leranı dərhal tərk edir.

Nə bir qohumu, nə də dolanışıq üçün vəsaiti qalan qız çıxış yolunu kəndə getməkdə görür. O, atasının vaxtilə aldığı təsərrüfatı təcili satmaq məqsədilə Kanarı adlı ucqar bir kəndə yollanır. Lakin orada gözlənilməz hadisələrlə qarşılaşır: yerli təbib Klava nənə onun doğma nənəsi çıxır, qonşuluqda arıçılıqla məşğul olan Nikolay isə təsərrüfatı bərpa etməkdə ona kömək əlini uzadır.

«Kanarlara xoş gəlmisiniz» serialı 2016-cı ildə Ukraynada istehsal olunub. Ekran əsərinin rejissoru Vladimir Xarçenko-Kulikovskidir. Baş rollarda Yelena Şilova, Aleksandr Paşkov, Mixail Kriştal və Konstantin Oktyabrski çəkiliblər.