Yeni bir sevgi

Gənc Estrelya əsl ailəsi barədə heç bir məlumata sahib deyil. Ehtiyac içində yaşayan anasına dəstək olmaq məqsədilə o, küçələrdə və mağazalarda xırda oğurluqlarla məşğul olur. Polislərdən qaçarkən yolu tanınmış vəkil Santyaqo Mendosa ilə kəsişir. İlk baxışdan aralarında güclü hisslər yaransa da, ailəli olan və balaca qızını çox sevən hüquqşünas risk etməkdən çəkinir. Qız dəmir barmaqlıqlar arxasına düşəndə Santyaqo ona kömək etməkdən imtina edir, sonradan peşman olub gəlsə də, qovulur.

Cəzasını çəkib çıxan Estrelya illərdir itirdiyi övladının dərdi ilə yaşayan nüfuzlu və xeyirxah Valentina adlı qadının evinə xidmətçi düzəlir. Kədərli vəkili görən Valentina onun acılarını anlayaraq onunla yeni münasibətə başlayır. Lakin Santyaqo bu evdə yenidən Estrelya ilə qarşılaşdıqda köhnə duyğular alovlanır. Qısqanclıqdan qəzəblənən Valentina rəqibini sıradan çıxarmağa çalışarkən keçmişin açılan sirri hər kəsin taleyini tamamilə dəyişir.

«Yeni bir sevgi» (Un nuevo amor) adlı Meksika serialı 2003-cü ildə istehsal olunub. Ekran əsərinin quruluşçu rejissorları Xose Luis Duran və Rafael Qutyerrezdir. Əsas rolları Karen Senties, Vanessa Akosta, Serxio Basanyes və Ramiro Uerta canlandırıblar.