Trotski

1940-cı ildə siyasi mühacir Lev Trotski Meksikada sığınacaq tapır. On bir illik sürgün dövründə bütün yaxınlarını itirən inqilabçı anlayır ki, İosif Stalin onu ömrünün sonuna qədər təqib edəcək. Gizlənməyin faydasız olduğunu dərk edən Trotski silah kimi sözləri seçir və böyük bir imperiyanın süqutundakı rolundan bəhs edən siyasi vəsiyyətini hazırlamaq qərarına gəlir.

Xatirələrini qələmə almaq üçün o, Stalinə rəğbət bəsləyən gənc kanadalı jurnalist Frenk Ceksonu dəvət edir. Trotski bu qatı rəqibini öz baxışlarına inandırmağı hədəfləyir. Lakin Cekson sıradan bir katib olmadığını dərhal sübut edir; o, inqilabçıya ən narahatedici sualları ünvanlayaraq onu keçmişin qaranlıq səhifələri ilə üz-üzə qoyur.

2017-ci il istehsalı olan «Trotski» bioqrafik dram serialı Rusiyada çəkilib. Ekran işinin quruluşçu rejissorları Aleksandr Kott və Konstantin Statskidir. Baş qəhrəmanı Konstantin Xabenski canlandırıb, digər əsas rollarda isə Olqa Sutulova, Aleksandra Mareyeva və Maksim Matveyev çəkilib.