Janna D'Ark

Şimali Fransanın ingilislər və burqundiyalılarla qanlı toqquşmalardan əziyyət çəkdiyi 1412-ci ildə Jak Darkın kəndli ailəsində bir qız uşağı dünyaya gəlir. Dövrün amansızlığı üzündən ata qızını öldürmək istəsə də, ana buna mane olur. Erkən yaşlarından müharibə və qətllərin şahidi olan balaca Janna on iki yaşında ilk dəfə ilahi nurla qarşılaşır.

Özünə Fransanı xilas etmək missiyasının verildiyini anlayan kəndli qız ingilisləri qovmaq və ölkəni birləşdirmək üçün vəliəhd Karlın yanına yollanır. Onun ilahi seçiminə inanmayan dofin və yepiskop Koşon isə cadugər Merlinin Loreyn qızı haqqındakı qədim kəlamından siyasi məqsədləri naminə istifadə etmək qərarına gəlirlər.

Kanada istehsalı olan «Joan of Arc» tarixi serialı 1999-cu ildə rejissor Kristian Düqe tərəfindən ekranlaşdırılıb. Baş qəhrəmanı Lili Sobeski canlandırıb, digər mühüm rolları Piter O'Tul, Çad Uillett və Piter Ştrauss ifa ediblər.