Ağıl qətldən üstündür

1985-ci ildə Nebraska ştatının Beatris qəsəbəsində yaşayan bir dul qadının qətlə yetirilməsi yerli sakinləri sarsıdır. Üç il davam edən araşdırmalardan sonra polis qətldə şübhəli bilinən altı nəfəri saxlayır. Həmin şəxslər törədilən cinayəti xatırlamasalar da, hüquq-mühafizə orqanlarının təzyiqi altında günahı öz boyunlarına götürməyə məcbur qalırlar.

Nəticədə günahsız insanlar uzun illəri dəmir barmaqlıqlar arxasında keçirməli olurlar. Yalnız onilliklər sonra məlum olur ki, bu şəxslər polisin qanunsuz hərəkətlərinin qurbanına çevriliblər. «Mind Over Murder» sənədli serialı saxta etirafların arxasında duran həqiqətləri və ədalət sisteminin böyük səhvini addım-addım araşdırır.

2022-ci ildə ABŞ-da istehsal olunmuş layihənin rejissoru Van Nanfudur. Ekran işində Tim Şelbern, Noy Arçibald, Skott Uotson və Kara D’Adamo kimi simalar yer alıb.