Nasistlərin meqa silahları

Dünya ağalığına nail olmaq istəyən nasist rəhbərliyi görünməmiş miqyasda mühəndislik və hərbi layihələrin icrasına başlamışdı. İkinci Dünya Müharibəsi illərində Almaniyanın mühəndisləri nəhəng müdafiə xətləri, qorxunc texnikalar və kütləvi qırğın vasitələri hazırlayırdılar. «Nazi Mega Weapons» sənədli serialı həmin dövrün mühəndislik sirlərini və hərbi planlarını fərqli baxış bucağından təhlil edir.

Ekran əsərində bu layihələri ərsəyə gətirən mühəndis və dizaynerlərin qarşılaşdıqları vəzifələr və onların fəaliyyəti addım-addım işıqlandırılır. Həmçinin nəhəng hərbi obyektlərin və sınaqdan keçirilən yeni texnologiyaların müharibənin gedişatına etdiyi təsirlər faktlarla nümayiş etdirilir. Hər bir detal bəşəriyyət tarixinin ən dağıdıcı qarşıdurmasında tətbiq olunan planların miqyasını göstərir.

Sənədli layihə ABŞ və Böyük Britaniya mütəxəssislərinin birgə əməyi sayəsində hazırlanıb. Rejissor kürsüsündə Sid Bennett və Qari Constoun əyləşib, araşdırmalarda isə Ceyms Holland, Riçard Lintern, Toni Pollard və Culian Forsayt kimi mütəxəssislər yer alıb. Yayıma 2013-cü ildə başlayan serial ümumilikdə yeddi mövsümdən ibarətdir.