Mənim adım Məhəmməd Əlidir

1967-ci ilin qışında Hyustonda baş tutan döyüşdə Məhəmməd Əli rinqdə Erni Terrellə ağır zərbələr endirirdi. Rəqibini bilərəkdən nokauta salmayan boksçu hər fürsətdə ondan adını soruşurdu. Əlinin bu dərəcədə qəzəblənməsinə səbəb Terrellin qarşılaşmadan əvvəl israrla onu köhnə adı Kassius Kley kimi çağırması idi.

Kley bu qarşılaşmadan üç il əvvəl adını dəyişmiş və pop-mədəniyyət tarixində ilk müsəlman superulduz olmuşdu. Malkolm İksin baxışlarını bölüşən və Vyetnam müharibəsində iştirakdan qəti şəkildə imtina edən boksçu mübarizəsini təkcə idmanda deyil, həm də rinqdən kənarda aparırdı.

«What's My Name: Muhammad Ali» sənədli bioqrafik serialı 2019-cu ildə ABŞ rejissoru Antuan Fukua tərəfindən çəkilib. Layihədə Bill Kosbi, Cim Braun, Ossi Devis və Dayana Ross kimi şəxslərin iştirakı ilə arxiv materialları yer alır.