İmperatorun aşpazı

Sadə kəndli gənc Tokudzo Akiyama gələcəyi barədə xüsusi planlar qurmadan yaşayırdı. Qərb üslubunda hazırlanmış bir kotletin dadına baxdıqdan sonra onun dünyagörüşü büsbütün dəyişir. Bu yeni ləzzətdən heyran qalan Tokudzo hər cür çətinliyə rəğmən qərb mətbəxinin sirlərinə yiyələnməyi qərara alır.

Aşpazlıq sənətini öyrənmək arzusu gənci əvvəlcə Tokioya, daha sonra isə Parisə aparır. Yad ölkədə ayrı-seçkilik və qərəzli münasibətlə üzləşməsinə baxmayaraq, o, Parisin məşhur «Ritz» otelinin baş aşpazı səviyyəsinə yüksəlir. Tokudzo cəmi 26 yaşında öz ölkəsinə qayıdaraq Yaponiya imperatorunun şəxsi baş aşpazı vəzifəsinə təyin olunur.

2015-ci ildə yayımlanan «Tenno no Ryoriban» («İmperatorun aşpazı») tarixi dram serialı real hadisələrə əsaslanır. Ekran əsərinin quruluşçu rejissorları Yuiçiro Hirakava və Yuci Nakamaedir, baş rolları isə Takeru Sato, Haru Kuroki, Sei Aşina və Ryu Morioka canlandırır.