Gələcəyi xatırla

Bütün bəşəriyyət eyni anda iki dəqiqəlik huşunu itirərək altı ay sonrakı gələcəyindən fraqmentlər görür. Bu qısa qapanma bütün dünyada saysız-hesabsız qəzalara və fəlakətlərə gətirib çıxarır. Ayıldıqdan sonra insanlar qəfil açılan bu mənzərənin şoku ilə üz-üzə qalırlar.

Hər kəs gələcəkdə gördüklərinə fərqli yanaşır. Bəziləri xoşbəxt anları tezləşdirməyə çalışır, digərləri taleyini dəyişmək istəyir və ya kədərə qapılır. Həmin dəqiqələrdə sadəcə qaranlıq görənlər isə tezliklə anlayırlar ki, yarım ildən sonra artıq həyatda olmayacaqlar. İnsanların qarşısında gələcəyin dəyişdirilməsinin mümkün olub-olmaması sualı durur.

ABŞ istehsalı olan «Gələcəyi xatırla» (Flashforward) adlı elmi-fantastik dram serialı 2009-cu ildə yayımlanıb. Layihənin rejissor kürsüsündə Nik Qomes və Bobbi Rot əyləşib. Baş rolları Cozef Fayns, Con Ço, Cek Davenport və Zakari Nayton canlandırıblar.