Özgə ev

Şıltaq kübar xanım Svetlana ilə birlikdə kurorta yollanan köməkçi Aleksandra gözlənilməz hadisələrlə qarşılaşır. Var-dövlət sahibi və dul qalmış Maksim Morozovun diqqətini çəkməyə çalışan Svetlana qəza nəticəsində ayağını sındırır və xəstəxanaya düşür. Burada onun yanına gələn Maksim təsadüfən Saşa ilə tanış olur və gənclər arasında qısa müddətdə isti münasibət yaranır. Cəmi bir həftə sonra iş adamı qıza evlilik təklifi edir.

Yeni ərinin dəbdəbəli malikanəsinə köçən Aleksandra həm yad mühitdən, həm də bu evin sakinlərindən çəkinməyə başlayır. Onu ən çox narahat edən məsələ isə Maksimin əvvəlki həyat yoldaşı Aqatanın müəmmalı şəkildə yoxa çıxmasıdır. Çox keçmədən gənc qadının yuxularına girən Aqata sanki onu nədənsə xəbərdar etməyə çalışır və tələsik verilən bu qərarın arxasındakı sirlər üzə çıxır.

Rusiyanın istehsalı olan bu detektiv və triller elementli melodram serialı 2026-cı ildə rejissor Stanislav Nazirov tərəfindən çəkilib. Layihədə əsas obrazları Yekaterina Samoylo, Anton Danilenko, Maya Voznesenskaya və Vera Voronkova canlandırıb.