Təqsirsiz

Tələbəlik illərində baş verən amansız dava Mateo Vidalın taleyini alt-üst etdi: təsadüfən bir nəfərin ölümünə səbəb olan gənc dörd illik həbs cəzasına məhkum olundu. Cəzasını çəkib azadlığa çıxdıqdan sonra qardaşının hüquq şirkətində işə düzələrək yeni həyata başlamağa çalışdı. Keçmişdən qalan yeganə iz isə vicdan əzabı və həyatına son qoyduğu gəncin anası ilə görüşləri idi.

Zamanla hər şey qaydasına düşdü: Mateo ailə qurdu, yeni ev aldı və həyat yoldaşı ilə birlikdə körpə intizarına başladı. Lakin qadının ezamiyyətə yollanması ilə qurulan nizam yenidən pozulur. Həyat yoldaşının telefonundan müəmmalı mesajlar gəlməyə başlayır, ardınca isə naməlum bir şəxs avtomobillə Mateonu vuraraq tapança ilə hədələyir.

İspaniya istehsalı olan «The Innocent» kriminal detektiv serialı 2021-ci ildə ekranlara çıxıb. Serialın rejissoru Oriol Paulodur. Əsas rolları Mario Kasas, Aura Qarrido, Aleksandra Ximenes və Xose Koronado canlandırıblar.