Holmsun son işi

1959-cu ilin baharında qopan güclü fırtına Mayorka yaxınlığındakı kiçik adada yerləşən mehmanxananın xarici aləmlə əlaqəsini kəsir. Həmin vaxt məkanda olan bütün işçilər və qonaqlar təcrid vəziyyətinə düşürlər. Qısa müddət sonra qapalı otaqda ingilis turist Eliza Manderin cəsədi tapılır: hadisə ilk baxışdan intihara bənzəsə də, tezliklə qəsdən törədilmiş cinayət izləri üzə çıxır.

Polislə əlaqə qurmaq mümkün olmadığından, araşdırmanı keçmişdə Şerlok Holms rolunu oynamış yaşlı aktyor Bencamin Bezil öz üzərinə götürür. O, vaxtilə canlandırdığı qəhrəmanın məntiqi təhlil üsullarını tətbiq edərək mehmanxanadakı şübhəliləri bir-bir yoxlamağa başlayır. Hər bir qonağın bu müəmmalı ölümdə əli ola bilər.

İspaniya istehsalı olan «Holmsun son işi» serialının rejissoru Feliks Viskarretdir. Ekran əsərinin əsas obrazlarını Maria Valverde, Maribel Verdu, Xose Koronado və Martinyo Rivas canlandırıblar.