İzsiz

Cek Melounun rəhbərlik etdiyi xüsusi istintaq qrupu yoxa çıxmış insanların axtarışı ilə məşğul olur. Təhqiqatçılar müasir psixologiyanın imkanlarından istifadə edərək qurbanların keçmişini və şəxsi həyatını dərindən araşdırırlar. Onlar insanın qaçırıldığını, qəsdən gizləndiyini, zorakılıq qurbanı olduğunu və ya intihar etdiyini müəyyənləşdirməyə çalışırlar.

Mütəxəssislər itkin düşən şəxsin kimliyini açmaqla onun yerini tapmağın mümkün olduğuna inanaraq həmin gün baş verənləri dəqiqəbədəqə bərpa edirlər. Bununla belə, iş heç də həmişə tərtib olunmuş plana uyğun getmir və gözlənilməz tərəfə yönəlir. İnsan zəiflikləri və keçmişdə buraxılan xətalar da bəzən mürəkkəb axtarış prosesində özünü göstərir.

ABŞ istehsalı olan «İzsiz» (Without a Trace) detektiv serialı 2002-ci ildə yayımlanmağa başlayıb və ümumilikdə 7 mövsüm davam edib. Layihənin rejissor kürsüsündə Con Şouolter və Pol Holahan əyləşib. Baş rolları Entoni LaPalya, Poppi Montqomeri, Mariann Jan-Batist və Enrike Mursiano canlandırıblar.