Zərif yarpaqlar, zəhərli köklər

Sergey Babkinin həyat yoldaşı Maşa məktəb yoldaşlarının Moskvaətrafı pansionatda təşkil olunan görüşünə dəvət alır. Tədbirin təşəbbüskarı keçmiş sinif lideri Sveta Roqozinadır və vaxtilə onun ucbatından qızların əksəriyyətinin yaddaşında ağır məktəb xatirələri qalıb. Buna baxmayaraq, xaricdə varlı ərləri hesabına yaşayan Roqozinanı və illər sonra dəyişən rəfiqələri görmək marağı hamını bir araya toplayır.

Qadınların söhbəti getdikcə gərginləşir və məclis keçmiş incikliklərin, eləcə də gizli saxlanılan böyük sirlərin üzə çıxdığı məkana çevrilir. Hər kəsin bir-birinə qarşı olan qəzəbi dərinləşir və vəziyyət fəlakətlə nəticələnir: qonaqlardan birinin meyiti tapılır.

2019-cu ildə Rusiyada çəkilmiş «Нежные листья, ядовитые корни» adlı dedektiv serialının rejissoru Ruslan Pauşudur. Baş rolları Yevgeni Pronin, Aleksey Vakulov, Svetlana Smirnova-Katsaqaciyeva və Polina Voyçenko canlandırıblar.