Təqsirsiz

Devid Kollinz həyat yoldaşını öldürməkdə təqsirli bilinərək ciddi rejimli həbsxanada yeddi il cəza çəkir. İllər sonra çıxarılan hökmün yanlış olduğu təsdiqlənir və o, azadlığa buraxılır. Evinə qayıdan kişi uşaqları və ailəsi ilə yenidən əlaqə qurmaq, eyni zamanda qətli həqiqətən kimin törətdiyini üzə çıxarmaq qərarına gəlir.

Lakin normal həyata adaptasiya olmaq gözlənildiyindən daha çətin keçir. Ətrafdakı bir çox insan hələ də onun cinayətkar olduğuna inanır və ona şübhə ilə yanaşır. Qınaq dolu baxışlar və etimadsızlıq şəraitində Devid doğmalarını geri qaytarmaq və həqiqəti tapmaq üçün addımlar atır.

Böyük Britaniya istehsalı olan «Təqsirsiz» kriminal dram serialı 2018-ci ildə nümayiş olunub və layihə 2 mövsümdən ibarətdir. Ekran əsərinin rejissorluğunu Riçard Klark və Treysi Larkomb edib. Əsas rolları Li İnqlbi, Deniel Rayan, Edrian Roulins və Hermiona Norris canlandırıb.