Qəza

Magistral yolda baş verən zəncirvari avtomobil qəzası çoxsaylı insan tələfatına səbəb olur. Zərərçəkənlər arasında tanınmış şəxslər də yer alır. Bir-birini tanımayan fərqli insanların yolları məhz həmin an və həmin məkanda kəsişir.

Faciənin səbəblərini aydınlaşdırmağa çalışan istintaqçılar adi bir araşdırmaya başlasalar da, gözlənilməz sirlərlə qarşılaşırlar. Hər bir qurbanın keçmişində rüşvət, sənəd oğurluğu, mənimsəmə və hətta qətl izinə rast gəlinir. Nəticədə yol hadisəsi böyük cinayətlər şəbəkəsinin üstünü açır.

Böyük Britaniya istehsalı olan «Qəza» (Collision) dram-detektiv serialı 2009-cu ildə nümayiş olunub. Layihənin rejissoru Mark Evansdır, əsas rolları Duqlas Henşall, Din Lennoks Kelli, Lüsi Qriffits və Fil Devis canlandırıblar.