Ögey qardaş

Norveç istehsalı olan «Halvbroren» dram serialı İkinci Dünya müharibəsinin bitdiyi vaxtdan yeni minilliyin astanasınadək olan əlli illik bir dövrü əhatə edir. Hadisələrin əsasında daxili aləmləri zədələnmiş iki qardaşın həyat yolu dayanır. Onların arasındakı münasibət onilliklər boyu nifrət, kəskin rəqabət və qarşısıalınmaz bağlılıqla müşayiət olunur.

Qardaşların ətrafında güclü xarakterə malik, ehtiraslı, lakin tənha qadınlar toplaşıb. Müharibənin başa çatdığı gün zorakılığa məruz qalmış ana ilə yanaşı, onları nənə və vaxtilə heç bir filmdə çəkilməyən lal kino aktrisası olan ulu nənə böyüdür. Həmin qadınların fərqli və kədərli taleləri böyüməkdə olan hər iki qardaşın xarakterinə və gələcəyinə təsir göstərir.

Dedektiv və dram janrında çəkilmiş bu serialın rejissoru Per-Olav Sorensendir. 2013-cü ildə yayımlanan layihədə əsas rolları Nikolay Kleve Brok, Frank Kjosas, Mariann Hole və Mariann Nilsen canlandırır.