Ovçu qadın

Polina əvvəllər İstintaq Komitəsində çalışsa da, sonradan rəsmi qurumdan ayrılaraq fərdi şəkildə araşdırmalar aparmağa başlayıb. O, mükafat qarşılığında cinayətkarları axtarıb tapır və fəaliyyətində artıq daha sərbəst metodlardan istifadə edir. Günlərin birində iki qətldə şübhəli bilinən gəncin atası kömək üçün Polinaya müraciət edir. Bütün sübutlar oğlunun əleyhinə olsa da, ata onun günahsızlığına qətiyyətlə inanır.

Polina əsl qatili aşkar etmək şərtilə işin icrasını öz üzərinə götürür. İstintaq materialları ilə tanış olarkən onun diqqətini şübhəli bir məqam cəlb edir. Keçmiş həmkarları hadisənin sadə bir qısqanclıq zəminində baş verdiyini iddia etsələr də, hər iki qurbanın qulağından yalnız bir sırğanın çıxarılması dedektivi dərindən düşünməyə vadar edir.

2020-ci ildə nümayiş olunan Rusiya istehsalı «Ovçu qadın» («Охотница») detektiv serialı 2 mövsümdən ibarətdir. Ekran əsərinin rejissoru Aleksandr Barşakdır. Əsas rolları Marusya Zıkova, Yana Quryanova, Pavel Barşak və Sergey Quzeyev canlandırıblar.