Kimsə

Kim Som hələ məktəb vaxtlarından proqramlaşdırma sahəsində xüsusi istedada malik idi. Asperger sindromu olan qız oyun aparatlarını yenidən quraşdıraraq pul qazanır, müsabiqələr üçün isə süni intellektli çat-bot hazırlayırdı. İllər sonra o, İT şirkətində texniki direktor vəzifəsinə yüksələrək populyar Somebody tanışlıq tətbiqini ərsəyə gətirir.

Lakin iki qadının məhz bu platforma vasitəsilə tanış olduqları şəxs tərəfindən qətlə yetirilməsi vəziyyəti kəskin dəyişir. Tətbiqdə bir neçə saxta hesabdan istifadə edən naməlum istifadəçi aşkarlanır. Bütün bu profillərə cavab verən Som, özü kimi qəribə xasiyyətli, hündürboy və yaraşıqlı Yun-o ilə tanış olur.

Cənubi Koreya istehsalı olan «Kimsə» serialı 2022-ci ildə rejissor Con Ci-u tərəfindən ekranlaşdırılıb. Qaranlıq triller və dram elementlərini birləşdirən layihədə baş rolları Kan He-rim, Kim Yon-qvan, Kim Yon-ci və Kim Su-yon canlandırır.