Tülkü təbəssümü

Tələbəlik illərindən sonra Tatyana ona aşiq olan qrup yoldaşı Balagurla ailə qurur. Əslində o, Akademik ləqəbli başqa bir gənclə evlənməyi planlaşdırırdı, lakin internetdə yayılan qalmaqallı şəkillər üzündən bu münasibətə son qoyulmuşdu. Aradan on il keçəndən sonra ərinin başqasını sevdiyini öyrənən Tatyana uşağı da götürüb anasının yanına köçür. Bir neçə gündən sonra əşyalarını götürmək üçün bağ evinə qayıtdıqda isə ərini bıçaqlanaraq öldürülmüş vəziyyətdə tapır.

Polis dərhal Tatyananı əsas şübhəli hesab edir və o, həbs olunmamaq üçün qaçmaq məcburiyyətində qalır. Ona kömək əlini uzadan yeganə şəxs isə keçmiş sevgilisi Akademik olur. Günahsız olduğunu sübut etmək istəyən qadın qətli araşdırmağa başlayır və izlərin institut yoldaşlarına apardığını anlayır. Hadisə baş verən axşam həmin evə gələn hər bir dostun, o cümlədən Akademikin cinayət üçün şəxsi səbəbləri var idi.

Rusiyada istehsal olunmuş «Tülkü təbəssümü» («Улыбка лиса») detektiv serialı 2016-cı ildə ekranlara çıxıb. Ekran əsərinin rejissoru İqor Drakadır. Baş rolları Alisa Varova, Aleksey Nilov, Mixail Tarabukin və Qalina Sumina canlandırıblar.