Daş ürək

Ağır boşanmadan sonra sevgiyə inamını itirən Qalina bütün diqqətini böyük bir qəzetin rəhbərliyinə yönəldib. Lakin onun redaksiyası sahibkar Vyaçeslav Andreyevin fırıldaqları haqqında qalmaqallı araşdırma dərc etdikdə işlər qarışır. Məlumat mənbələrindən birinin yoxlanılmadığı üzə çıxır və iş adamı böhtan iddiası ilə məhkəməyə müraciət edir. Şərəfini qorumaq istəyən baş redaktor Andreyevə qarşı real sübutlar tapmağa məcbur qalır.

Qalina vacib şahidi tapmaq üçün kəndə yollanır və orada həkim Mixail Leontyevlə qarşılaşır. Ehtimallara görə, həkimin həyat yoldaşı məhz bu sahibkarın ucbatından vəfat edib. Tənha yaşayan Mixail əvvəlcə mətbuat nümayəndələri ilə danışmaqdan imtina etsə də, Qalina onunla dil tapmağı bacarır. Zaman keçdikcə bu ünsiyyət sadəcə təhqiqat çərçivəsində qalmır və onların arasında hisslər yaranır.

2016-cı il istehsalı olan Rusiyanın «Daş ürək» («Каменное сердце») detektiv serialının quruluşçu rejissoru Aleksandr Aravindir. Əsas rolları Yekaterina Volkova, Vladimir Koşevoy, Aleksandr Valner və Yekaterina Dolqova canlandırıblar.