Mirvari dalğıcı

Sevdiyi kişi ilə birgə yaşayışın gətirdiyi gündəlik məişət qayğıları Nadya Mitrofanovanı tezliklə yormağa başlayır. Mətbəx işlərindən uzaqlaşmaq istəyən gənc qadın fotomodel qonşusu Lizanın dəvəti ilə qapalı dəb nümayişinə yollanır. Tədbirdə o, Lizanın rəfiqəsi Sonya ilə tanış olur. Sonya hər kəsə baha qiymətli nişan üzüyünü göstərsə də, nişanlısının adını gizli saxlayır. Cəmi bir neçə dəqiqə sonra isə gənc qızın meyiti tapılır və barmağındakı üzük yoxa çıxır.

«Ныряльщица за жемчугом» serialının qəhrəmanı baş verən cinayətin izinə düşərək müstəqil təhqiqata başlayır. Axtarışlar zamanı model standartlarından uzaq cazibəsi ilə modelyerin diqqətini çəkən Nadya onun həddindən artıq israrlı addımları ilə də üzləşməli olur.

2018-ci ildə Rusiyada çəkilmiş ekran əsərinin quruluşçu rejissoru Nataliya Mikryukovadır. Əsas obrazları Yekaterina Kopanova, Stanislav Bondarenko, Marina Volkova və Kirill Rubtsov canlandırıb.