Bataqlıq

1984-cü ildə Polşanın kiçik bir əyalət şəhərində amansız cinayət baş verir. Meşədə boğazı kəsilmiş gənc fahişə və yerli idman komitəsinin rəhbərinin cəsədləri tapılır. Milis orqanları işi dərindən araşdırmaq əvəzinə, tez bir zamanda günah keçisi taparaq cinayət dosyesini ört-basdır etməyə çalışır.

Lakin «Axşam kuryeri» qəzetinin müxbirləri rəsmi versiyada açıq-aşkar ziddiyyətlər görürlər. Şübhəli şəxsin bütün gecəni barda keçirdiyi bəlli olur, üstəlik, şəhərdə iki yeniyetmənin müəmmalı intiharı da bu qətllərlə bağlı görünür. Təcrübəli jurnalist Vitold və gənc həmkarı Pyotr hadisələrin arxasındakı həqiqəti üzə çıxarmaq üçün təhqiqata başlayırlar.

2018-ci il istehsalı olan «The Mire» («Bataqlıq») adlı Polşa detektiv serialı 2 mövsümdən ibarətdir. Kriminal trillerin rejissor kürsüsündə Yan Xoloubek və Kamil Miştal əyləşib, baş rolları isə David Oqrodnik, Andjey Severin, Zofya Vıxlac və Maqdalena Rujçka canlandırıb.