İttihamın şahidi

1920-ci illərin Londonunda varlı kübar qadın Emili Frençin qətlə yetirilməsi böyük səs-küy doğurur. Əsas şübhələr dərhal gənc Leonard Voulun üzərinə yönəlir. Məhkəmədə ifadə verən xidmətçi qadın iddia edir ki, gənc oğlan var-dövlətə sahib çıxmaq üçün bu cinayəti törədib.

İttiham olunan Leonard isə günahsız olduğunu bildirir və xilas yolunu sevgilisində görür. Onun sözlərinə görə, xor artisti işləyən sirli Romayn onun əslində günahsız olduğunu sübut edə biləcək yeganə şəxsdir. Beləliklə, məhkəmə zalında taleyüklü ifadələr ətrafında gərgin mübarizə başlayır.

«The Witness for the Prosecution» detektiv serialı rejissor Culian Carrold tərəfindən ekranlaşdırılıb. Böyük Britaniya və ABŞ-ın birgə istehsalı olan bu dramatik layihə 2016-cı ildə yayımlanıb. Baş rolları Billi Houl, Kim Ketroll, Monika Dolan və Andrea Raysboro canlandırıb.