Əks olunma

Keçmiş milis mayoru Yelizaveta Kruqlova quldur dəstəsi yaratdığı üçün kəsilən 12 illik cəzasının artıq yeddi ilini qadın koloniyasında çəkib. Onun uşaq evinə düşən balaca qızı Polina anasını demək olar ki, xatırlamır. Yaxşı davranışına görə vaxtından əvvəl azadlığa çıxmağa hazırlaşarkən Yelizavetaya beyin xərçəngi diaqnozu qoyulur və cəmi bir neçə ay ömrü qaldığı məlum olur.

Elə bu ərəfədə həmin həbsxanaya vəzifə səlahiyyətlərini aşdığına görə məhkum edilmiş keçmiş müstəntiq Darya Yeromina gətirilir. O, illərlə Anatoli adlı seriyalı qatili yaxalamağa çalışmış, lakin sonda özü dəmir barmaqlıqlar arxasına düşmüşdür. Kruqlova ona plastik cərrahiyyə vasitəsilə simalarını və talelərini dəyişməyi təklif edir: Darya onun yerinə azadlığa çıxmalı, qızına analıq etməli və pullarından yararlanmalıdır, lakin bunun üçün öz keçmişindən tamamilə imtina etməlidir.

Rusiyanın «Əks olunma» adlı dedektiv serialı 2011-ci ildə işıq üzü görüb. Ekran əsərinin quruluşçu rejissorları Sergey Danelyan və Aleksandr Şurixindir. Baş rolları Olqa Poqodina, Polya Polyakova, Andrey Bilanov və Yelena Kotelnikova canlandırıblar.