Sıfır Saat

Müasir skeptik jurnalının naşiri Henk Qalliston illərdir fövqəltəbii iddiaları təkzib etmək və qəsd nəzəriyyələrini ifşa etməklə məşğuldur. Həyatında yalnız məntiqə güvənən bu adamın dünyası həyat yoldaşı Leylanın qəfil oğurlanması ilə qarışır. Qadın özünə məxsus qədim saatlar mağazasından naməlum şəxslər tərəfindən qaçırılır.

Mağazadakı saatlardan birinin içində qədim xəritə gizlədilib və onun açdığı sirlər bütün bəşəriyyət üçün böyük fəlakətə səbəb ola bilər. Henk arvadını xilas etmək naminə gizli simvolları çözməli və Ağ Vinsent ləqəbli şəxsin bu sirləri ələ keçirməsinin qarşısını almalıdır. Bu axtarışda ona iki gənc əməkdaşı Reyçel və Erron, eləcə də FTB agenti Bekka Rayli kömək edir.

ABŞ istehsalı olan triller janrlı «Zero Hour» serialı 2013-cü ildə işıq üzü görüb. Ekran əsərinin rejissorları Stiven Uilyams və Pyer Morel, baş rol ifaçıları isə Entoni Edvards, Karmen Ecoko, Skott Maykl Foster və Eddison Timlindir.