Uydurulmamış qətl

Turizm agentliyində çalışan Natalya küçədə sahibsiz qalmış bir rotveyler tapır və ona kömək etmək qərarına gəlir. İtin xaltasındakı ünvana gəlsə də, evdə heç kimi tapmır və poçt qutusundakı açarla qapını açıb içəridə qalır. Çox keçmədən məlum olur ki, bir mərtəbə aşağıda gənc qadının maraqla oxuduğu detektiv əsərlərin müəllifi, yazıçı Voronov yaşayır.

Bu gözlənilməz tanışlıq onu təhlükəli hadisələrin içinə çəkir: nüfuzlu bir bankir qətlə yetirilir, itin və mənzilin sahibi Darya isə yoxa çıxır. Natalyanın həmin evdə peyda olması rəsmi istintaqın işini çətinləşdirir, qadının özü isə nə edəcəyini bilmir. Yaranmış mürəkkəb vəziyyətdən çıxış yolunu tapmaqda ona yalnız qonşusu olan sevimli yazıçı kömək edə bilər.

«Uydurulmamış qətl» («Непридуманное убийство») adlı Rusiya istehsalı detektiv serialı 2009-cu ildə işıq üzü görüb. Ekran əsərinin rejissoru Viktoriya Derjitskayadır, baş rolları isə Svetlana İvanova, Andrey İlyin, Aleksandr Boyev və Yuliya Zimina canlandırıblar.