Sakitlik hökm sürür

Valideynlərini qətlə yetirməkdə təqsirləndirilən Serxio altı illik həbs cəzasını başa vuraraq azadlığa çıxır. O, məhbus olduğu bütün bu müddət ərzində baş verənlər haqqında heç kimə bir kəlmə də danışmayıb və tamamilə susmağa üstünlük verib.

Cəmiyyət arasına qayıdan gəncin ardınca psixiatr Ana və onun komandası gizli nəzarətə başlayır. Mütəxəssislər kameralar vasitəsilə onun hər addımını izləyərək daxili vəziyyətini anlamağa çalışırlar. Həkimlərin əsas məqsədi Serxionun ətrafdakı insanlar üçün təhlükə törədib-törətmədiyini müəyyən etməkdir.

İspaniya istehsalı olan «Mute» serialı 2023-cü ildə işıq üzü görüb. Qruruluşçu rejissorları Qabe İbanyes və Esteban Krespo olan bu dramatik trillerdə baş rolları Aron Piper və Almudena Amor canlandırıb.