Keçmişdən dəlillər

Yetmişinci illərin ortalarında Oktyabrsk şəhərində gənc qızların qətlə yetirilməsi ilə bağlı silsilə cinayətlər baş verir. Qatil qurbanlarına caynaq formalı bıçaqla xəsarət yetirdiyi üçün ona Qurd ləqəbi verilir. İllər sonra yazıçı Vasili Tixonov həmin hadisələrə əsaslanan «Qurd vaxtı» adlı roman qələmə alır və kitabın sonunda qatilin kimliyini açıqlayır. Əsərin əsasında şəhərdə bədii filmin çəkilişlərinə başlanılır.

Kino çəkilişləri davam edərkən şəhərdə eyni üsulla törədilən yeni cinayətlər qeydə alınır. Hadisələrin gedişatı keçmişdəki qatilin onilliklər sonra yenidən geri qayıtdığını xatırladır. Hüquq-mühafizə orqanları baş verənlərin arxasında köhnə caninin, yoxsa onun təqlidçisinin dayandığını müəyyənləşdirməlidir.

Rusiyanın «Улики из прошлого» adlı detektiv serialı 2020-ci ildə ekranlara çıxıb və 4 mövsümdən ibarətdir. Ekran əsərinin rejissoru Pyotr Zabelindir, əsas rolları isə Anna Vasilyeva-Abramoviç, İqor Yudin, Andrey Qulnev və Darya Parmenenkova canlandırıb.